Жорий йилнинг кузидан Facebook ижтимоий тармоғи видео ишлаб чиқарувчи йирик компаниялар, мисол учун, NBA, Fox Sports ва Funny or Die кабиларнинг роликларида реклама жойлаштиришни режалаштирмоқда.

Бунинг учун ижтимоий тармоқнинг тасмасига Suggested Videos (“Таклиф қилинадиган видеолар”) блоки қўшилади. Ушбу блок фойдаланувчи ўз тасмасидаги видеога “лайк” тугмасини босганда ёки кўраётганда пайдо бўлади. Таклиф қилинадиган блокда реклама роликлари жойлаштирилади. Бундан ташқари, ижтимоий тармоқ янгиликлар тасмасига автоматик ишга тушувчи видеорекламани ҳам жойлаштиради.

Контент ишлаб чиқарувчилари рекламадан тушган фойдадан бир қисмини олишади. Рекламадан тушган даромад шу тарзда (YouTube`даги каби) тақсимланади: 55 фоиз – видео муаллифига, 45 фоиз – платформага. Facebook рекламадан тушган фойдани муаллифлар орасида ҳам тақсимлаб беради. Масалан, агар реклама учта муаллифнинг видеосида жойлаштирилган бўлса, унда улар орасидаги фойда ҳар бир муаллифнинг видеоси неча марта томоша қилингани ва унга қанча вақт ажратилганига мос равишда тақсимланади.

Facebook ижтимоий тармоқдаги видео хизматни 1,5 йилдан бери ривожлантириб келмоқда. Бу вақт мобайнида ижтимоий тармоқ тақдим қилиш алгоритмида бир қанча ўзгартиришлар амалга оширди (мисол учун, Facebook даги видео фойдаланувчилар тасмаларида кўпроқ пайдо бўлади) ва бошқа сайтлардаги видео учун кўринишни ўзгартирди.