2 июль куни Филиппиннинг Лейта ороли яқинида йўловчи пароми ҳалокатга учраши натижасида ҳалок бўлганлар сони 38 нафарга етди. Бу ҳақда Филиппин соҳил қўриқлаш хизмати томонидан хабар қилинган.

Хабарда айтилишича, 134 киши қутқариб олинган, 15 киши бедарак йўқолган, деб ҳисобланмоқда.

Бундан олдин ҳалокат қурбонлари сони 36 нафар бўлгани хабар қилинганди.

Филиппин соҳил қўриқлаш хизмати раҳбари Арман Балилонинг маълум қилишича, қутқариш ишлари жараёнидан Филиппин Ҳарбий-денгиз кучларига тегишли кема ҳамда 2 ҳарбий самолёт иштирок этган.

Кема MV Kim Nirvana-B Ормок портига 200 метр узоқликда фалокатга учраган. Кема Камотес оролига йўл олган бўлиб, кучли денгиз тўлқинининг кўтарилиши оқибатида очиқ денгизга чиққан кема ағдарилиб кетган.

Кемага ҳаддан ташқари кўп юк ортилгани ҳалокатга сабаб бўлгани айтилмоқда.

Сув транспорти 7 мингдан ортиқ ороллар мавжуд бўлган Филиппинда асосий транспорт ҳисобланади ва бу архипелаг давлатда тез-тез шундай ҳалокатлар содир бўлиб туради.

1987 йилнинг декабрида йўловчи кема ва сувости танкери тўқнашиб кетиши натижасида 4 минг нафардан ортиқ филиппинлик ҳалок бўлганди.