Garmin компанияси велосипедчилар учун Varia радарини яратди. Қурилма велосипедчини орқадан машина яқинлашаётганидан огоҳлантириш учун мўлжалланган ҳамда ҳайдовчилар эътиборини жалб қилиш учун орқа фонар функцясини бажаради.

Қурилма Жанубий Африканинг iKubu компанияси томонидан яратилган велосипедлар учун радар тизимига асосланган. Ушбу компания 2015 йил январда Garmin томонидан сотиб олинган эди.



Garmin келтирган статистик маълумотларга кўра, АҚШда аварияга учрайдиган велосипедчилардан 40 фоизи ҳаракатланиш пайтида орқадан келаётган транспорт воситаси билан тўқнашишдан азият чекканлар.

Varia радари велосипед орқасига маҳкамланади. Varia датчик ёрдамида велосипедчини орқадан келаётган транспорт воситасидан хабардор қилиш учун велосипед орқасидаги 140 метрлик ҳудудни сканерлайди. Орқадан келаётган автомобиль ҳайдовчисининг эътибори автомобиль велосипедга яқинлашгани сари орқа фонарнинг тезлашувчи чақнашлари билан жалб қилинади.

Олинган маълумот датчикдан Garmin Edge велокомпьютери ёки рулга маҳккамланган тизимга узатилади. Бу велосипедчига йўлдан чалғимаган ҳолда транспорт воситасининг яқинлашишига жавоб беришга ва зарурат туғилганда йўл четига ўтишига имкон беради.

Garmin Varia радари кузда сотувга чиқарилади. Радарнинг ўзининг нархи 199,99 долларни, рулга маҳкамланувчи огоҳлантириш тизими билан биргаликдаги нархи 299,99 долларни ташкил қилади.