Германия полицияси Киля шаҳри яқинидаги виллалардан бирининг ертўласида 1943 йилда ишлаб чиқарилган “Пантера” танкини топди. Бундан ташқари, у ерда торпедо ва бошқа қурол-аслаҳалар ҳам топилган. Бу ҳақда The Local хабар бермоқда.

Ҳуқуқ-тартибот муассасалари ходимлари топилмаларни мусодара қилишди. Киля прокуратурасида Хайкендорфедаги вилланинг эгаси танк сақлашга ҳақи бўлмагани, чунки бу қонунан тақиқлангани айтилди. Вилла эгаси адвокатининг фикрича, танк бошқа снаряд отолмаслиги сабабли, мижозининг ҳеч қандай айби йўқ.

Маҳаллий полициянинг расмий вакили мамлакат армияси танкни ертўладан чиқариб олиш учун зирҳли таъмирлаш-эвакуация машиналарини юборганига қарамасдан ҳозирча танкни ертўладан чиқаришнинг имкони бўлмаганини айтди.

Хайкендорф мэри Александер Орт танкнинг топилганидан таажжубда эмаслигини айтди. “Танк эгаси унда 1978 йилдаги кучли қор пайтида кезиб юрган эди”, деб айтди мэр. Унинг фикрича, танкнинг 70 ёшли эгасининг бу ҳарбий машинага қизиқишида ҳеч қандай ғайритабиий нарса йўқ. “Кимларгадир паровозлар, кимларгадир танклар ёқади”, деб айтди Орт.

“Пантера” Иккинчи жаҳон уруши пайтида Германияда ишлаб чиқарилган танк бўлиб, биринчи марта Курск ёйидаги жангда қўлланилган. Бир қатор экспертларнинг фикрича, ушбу танк Иккинчи жаҳон уруши пайтидаги энг яхши немис танки ва дунёдаги энг яхши танклардан бири бўлган.