АҚШ Федерал қидирув бюроси 5 нафар хавфли хакернинг қаерга бекингани ҳақида маълумотлар учун жами 4,2 млн доллар миқдоридаги мукофот эълон қилди. Бу ҳақда The Washington Post хабар бермоқда.

Хабарда ёзилишича, мукофотнинг асосий қисми, 3 млн доллар россиялик Евгений Богачев ҳақидаги маълумот учун ажратилган. У 1 млн донадан ортиқ компьютердан маълумотларни ўғирлаганликда айбланмоқда.

Шунингдек, руминиялик Никулае Попеску ҳам "хавфлилик даражаси" бўйича Богачевдан қолишмаслиги айтилган. У ҳақдаги маълумот учун 1 млн долларлик мукофот ваъда қилинган.

Россиялик Алексей Белан (100 минг доллар), латвиялик Петерис Сахуворс (50 минг доллар) ва ҳиндистонлик Кумар Жайн (50 минг доллар) каби хорижлик хакерлар бўйича маълумотлар учун ҳам кичикроқ миқдордаги мукофотлар берилиши маълум қилинган.

Бу хакерлар зарарли вируслар, сохта интернет савдолари, вирус дастурлари яратиш билан шуғулланганликда айбланади.