Тунис Ички ишлар вазирлиги Сус шаҳрида теракт амалга оширилиши ҳақида май ойидаёқ маълумотга эга бўлган. Бу ҳақда Independent нашрига Тунис хавфсизлик кучлари ҳаракатларини мониторинг қилиш ташкилоти раҳбари Волид Зарруқ маълум қилган.

Зарруқнинг айтишича, Тунис ИИВга теракт "ёнаётган машиналар" орқали амалга оширилиши ҳақида маълумот келиб тушган. Лекин манба бу борада бошқа маълумот бермаган ва ИИВ бу борада бошқа иш олиб бормаган.

"Ҳужум май ойида бўлиши ҳақида маълумот берилган, теракт эса июнь ойида содир этилди. Бу ерда қандайдир хатолик юз берди", дейди Зарруқ.

Зарруқ Ички ишлар хизмати тизимида салбий муҳит мавжудлиги ҳамда порахўрлик авж олгани ҳақида гапирган.

Тунис ИИВ бу борада ҳозирча изоҳ бермаган.

Эслатиб ўтамиз, 26 июнь куни Туниснинг Ўрта Ер денгизи соҳилидаги Сус шаҳри яқинидаги икки меҳмонхонага "ИШИД" жангарилари томонидан ҳужум уюштирилган, икки нафар жангари меҳмонхонадаги 39 кишини отиб ташлаган. Улардан бири полиция томонидан йўқ қилинган, иккинчиси ҳибсга олинган.