3 июль куни Қирғизистоннинг Ўш шаҳрида Шайх Муҳаммад Содиқ Муҳаммад Юсуф номидаги кутубхонанинг очилиш маросими бўлиб ўтди. Бу ҳақда гувоҳлар фейсбукда маълум қилишган.

Аниқлик киритилишича, ушбу кутубхона шаҳардаги “Қора олма” кафеси ёнида ташкил этилган.

Тадбирда шаҳар қозилиги, Бишкек университети вакиллари ва турли миллатга мансуб маҳаллий ёшлар иштирок этган.

Ҳозирги вақтда кутубхонада диний адабиётлар тўпланган, бундан ташқари бу ерда турли ўқув қўлланмалари, болалар адабиётлари, юридик китоблар, рус, ўзбек, қирғиз мумтоз адабиёти асарларини топиш мумкинлиги айтилган.

Кутубхона ходимларининг сўзларига кўра, ҳозирги вақтда муассаса фондининг 70-80 фоизи шайхнинг китобларидан ташкил топган. Келажакда эса уларнинг сонини янада ошириш кўзда тутилган.

Кутубхона фондини бойитиш мақсадида шайх китоблари Ўзбекистондан олиб келиниши режалаштирилган.