WikiLeaks чоп этган янги ҳужжатларда АҚШнинг Марказий разведка бошқармаси ва Миллий хавфсизлик агентлиги Германия канцлери Ангела Меркель девонхонаси ходимларини тинглаш учун Берлинда махсус бошқармага эга бўлганлиги айтилмоқда. Бу ҳақда Sueddeutsche Zeitung нашри хабар бермоқда.

Нашр маълумотларига кўра, ушбу бошқарма Маълумотлар йиғиш махсус хизмати деб аталган. Ҳужжатларда ушбу хизмат 2011 йилдан фаолият юритгани ва телефон суҳбатларини тинглаш билан шуғуллангани айтилган.

Ушбу хизмат ходимлари Меркелнинг Европа сиёсати бўйича маслаҳатчиси Николаус Майер-Ландрут ва Франциянинг собиқ президенти Николя Саркози маслаҳатчиси ўртасидаги суҳбатларни эшитган бўлиши мумкинлиги айтилмоқда.

Аввалроқ бу хизматнинг мавжудлиги ҳақидаги маълумот МХАнинг собиқ ходими Эдвард Сноуден ошкор этган ҳужжатларда тилга олинганлиги маълум қилинганди. Ўшанда Сноуден ушбу хизмат 80 та жойда, жумладан Европада 19 та жойда фаолият юритишини таъкидлаган эди.