Нигериянинг Жос шаҳрида содир этилган иккита портлаш оқибатида 51 киши ҳалок бўлди, деб хабар бермоқда Associated Press ахборот агентлиги.

Биринчи портлаш масжидда, иккинчиси шаҳар марказидаги ресторанда содир этилди. Гувоҳларнинг айтишича, жангарилар масжидни уч томонидан ўққа тутишган, шундан сўнг портлаш юз берган. Ушбу ҳужум учун жавобгарликни “Боко Ҳарам” экстремистик гуруҳи ўз зиммасига олди.

Бундан бир неча соат олдин Потискум шаҳридаги черковда террорчи қиз ўзини портлатиб юбориши оқибатида 6 киши ҳалок бўлди.

Нигерия Фавқулодда вазиятлар миллий агентлигининг маълумотларига кўра, 67 киши яраланган. Полициянинг қайд этишича, қутқарув ишлари олиб борилаётгани сабабли қурбонларнинг аниқ сони ўрнатилмаган.

Ўтган ҳафтада “Боко Ҳарам” жангарилари мамлакатнинг шимоли-шарқидаги бир нечта қишлоқларга ҳужум уюштириб, 32 та черков ва 300 га яқин уйни ёқиб юборишган. Ҳафта давомида жангариларнинг ҳужумлари оқибатида 300 дан кўпроқ одам ҳалок бўлган.