Ўзбекистон ҳукуматининг қарорига мувофиқ мамлакатда кўмир брикетларини ишлаб чиқариш ва сотиш бўйича қўшимча чора-тадбирлар тасдиқланди.
Қарор кўмир брикетлари ишлаб чиқаришни комплекс йўлга қўйиш, аҳоли ва бюджет ташкилотларига арзон нархларда белгиланган миқдорда ва ўз вақтида кўмир етказиб бериш ишларини такомиллаштириш мақсадида қабул қилинди.
Ҳужжатда таъкидланишича, “Ўзбеккўмир” АЖ ушбу мақсадлар доирасида 14та ҳудудий дистрибьюторлик марказларини ҳамда 71та филиалларини ташкил қилди. Ўрнатилган тартибга кўра кўмир маҳсулотлари реализацияси ушбу марказ ва филиаллар орқали амалга оширилади.
Кўмир брикетлари ишлаб чиқарувчи корхоналар рўйхати танлов комиссиялари томонидан махсус тузиб чиқилади. Комиссиялар ишининг якунларига кўра тегишли рўйхатлар тузиб чиқилиб, фақат шу рўйхатлардан ўрин олган корхоналаргина кўмир брикетлари ишлаб чиқариш ва айтилган марказларга етказиш ҳуқуқига эга бўлади.