Россия Давлат Думаси депутатлари Ўрта Осиё давлатлари билан визасиз тартибни бекор қилиб, у ердан кириб келаётган муҳожирларнинг ИШИД сингари ташкилотларга аъзолигини текширишни кучайтиришни таклиф қилиб чиқди. Бу ҳақда “Известия” газетаси ёзмоқда.
Маълумотга қараганда, Россия коммунистик партияси марказий қўмитаси раиси Сергей Обухов ва унинг ёрдамчиси, Думанинг миллатлар масалалари бўйича қўмитаси раиси ўринбосари Валерий Рашкин томонидан ёзилган мурожаатнома федерал миграция хизмати раҳбари Константин Ромоданов ва федерал чегара хизмати раҳбари Владимир Кулишовларга йўлланган.
Депутатларнинг фикрича, ИШИД ва унга яқин гуруҳлар Ўрта Осиё давлатларида жангариларни ёллаб, сўнг уларни меҳнат муҳожирлари қиёфасида қўпорувчилик ҳаракатлари уюштириш учун Россияга юбориши мумкин.
Айни пайтда Ўзбекистон, Қирғизистон, Тожикистон ва Туркманистон фуқаролари Россияга визасиз кириш ҳуқуқига эга. Бунинг учун паспортнинг ўзи кифоя. Лекин бу паспортларнинг ҳаққонийлигини текшириш кўплаб қийинчилик туғдириши мумкин. Депутатларнинг фикрича, агар тилга олинган давлатлар фуқаролари Россияга келишдан олдин элчихоналарга кўплаб ҳужжатлар пакетини топширсалар, бу федерал чегара хизматига уларнинг ИШИДга алоқадор-алоқадор эмаслигини текширишга қўшимча вақт беради.