Туркия йўловчи ташувчи Turkish Airlines авиакомпанияси Бангкок — Истанбул йўналишида ҳаракатланаётган самолёти бортда портловчи модда борлиги билан қилинган таҳдид сабабли Нью-Дели аэропортига қўнишга мажбур бўлди. Бу ҳақда NTV телеканали хабар тарқатди.

Парвоз давомида самолёт ходимлари ҳожатхоналарнинг бирида лайнер бортида портловчи модда борлиги билан таҳдид қилинган ёзувни топиб олишган. Натижада Airbus А330 русумли самолёт Ҳиндистон пойтахтидаги аэропортнинг хавфсиз ҳудудига қўнган. Салонни текшириш учун 148 нафа йўловчи бошқа ҳудудга кўчирилган. Текширувдан сўнг қайта учишга қарор қилинган.

Бу Туркия компанияси билан йил бошидан содир бўлаётган олтинчи воқеа саналади. Олдинги ҳолатларда ҳам ҳожатхонадан портловчи модда борлиги ҳақидаги ёзувлар топилган. Барча маълумотлар кейинчалик ёлғонлиги аниқланган.