Самарқанд вилояти Ургут туманидаги Мирзабоғлон ва Чеп маҳаллаларида, шунингдек, “Золотинька” ёзги оромгоҳи дам олувчилари орасида бир қатор маърифий ва спорт тадбирлари ўтказилди. Тадбир вилоят ИИБ инсон ҳуқуқларини ҳимоя қилиш ва юридик таъминот бўлими ходимлари томонидан ўтказилди. Бу ҳақда “На посту” газетаси хабар бермоқда.
Маҳаллаларда олиб борилган тушунтириш ишларида ёшларнинг спорт билан шуғулланиши, таълим олиши зарурлиги, гиёҳванд моддаларнинг жамиятга ва алоҳида инсонга келтирадиган зарари ҳақида батафсил маълумот берилди.
Шунингдек, тадбирлар иштирокчиларига “Адашганлар қисмати” ҳужжатли фильми намойиш этиб берилди.
Ёзги оромгоҳ дам олувчилари орасида “Биз гиёҳвандликка қаршимиз!” шиори остида спорт тадбирлари ўтказилди. Ғолибларга мукофотларни наркотрафик ва гиёҳванд моддаларнинг ноқонуний савдосига қарши кураш бўлими бошлиғи подполковник Хайрулло Бобоқулов ва ИИБ ҳуқуқбузарликлар профилактикаси бошқармаси раҳбари подполковник Рашиджон Раҳимовлар топширди.