Москванинг «Локомотив» клуби аъзоси бўлмиш ўзбекистонлик ҳимоячи Виталий Денисов «Зенит»ни юлдузлар клуби деб ҳисобламаслигини айтиб ўтди.

У жамоаси билан 12 июль куни «Зенит»га қарши бўлиб ўтадиган Россия Суперкубоги ўйинида ғалаба учун майдонга тушади. 

«Юлдузли «Зенит» — нима дегани бу? Ким у ерда юлдуз? Халк? Гарай, Витцель, Хави Гарсия? Халк – ҳа, юлдуз, лекин қолганлар... Ҳа, бу йигитлар яхши чемпионатларда ўйнаган, бироқ уларни улуғлаштириб юбормаган бўлардим», - дейди Денисов. 

«Биз ҳаммамиз ҳам одаммиз, томиримизда бир хилда қон оқади. Кўрамиз, ким кучлироқ чиқаркин ва кимда ғалабага бўлган иштиёқ кўпроқ бўларкин. Қўрқинчли жойи йўқ. Ўйин Питерда бўлади, «Зенит»га деворлар ҳам ёрдам беради, бироқ ўйин тақдири майдонда ҳал бўлади», - деди Ўзбекистон миллий терма жамоаси ҳимоячиси Виталий Денисов.

Бироз олдинроқ, "Локомотив"нинг бошқа бир ҳимоячиси Неманья Пейчинович 12 июль кунги ўйинга "жанговар" тайёргарлик олиб борилаётганини айтиб ўтган.