Бирлашган Араб Амирликларида асосий мақсади ИШИД террорчилик ташкилотининг тарғибот-ташвиқотига қарши курашиш бўлган аксилтеррорчилик маркази ўз ишини бошлади.

Al Arabiya телеканалининг хабар беришича, Абу-Дабида жойлашган “Савоб” деб аталувчи ушбу ахборот марказининг очилишида БАА ҳукумати билан бир қаторда АҚШ ҳам иштирок этди.

Марказ ташкилотчиларининг ғояси бўйича, “Савоб” маркази “Ироқ ва Суриядаги ИШИДга қарши курашувчи халқаро коалициянинг ахборот ташкил этувчиси” бўлиши керак. Хусусан, ахборот маркази ИШИД ўз таъсирини тарқатишда фойдаланаётган онлайн-инструментлар ва интернет-ресурслардан фойдаланади. Тузилманинг ишига “мўътадил ислом позициясини ёқлаб чиқувчи ва асосан ёшларга катта таъсирга эга минтақадаги энг таниқли кишилар” жалб қилинади.

Ҳанузгача ИШИД интернет ва айниқса ижтимоий тармоқлардан ўзининг ташвиқот материалларини тарқатиш учун самарали фойдаланиб келмоқда. Мавжуд маълумотларга кўра, ИШИДнинг тарғибот “қармоғи”га ҳар ой турли давлатлардан террорчилик гуруҳи билан бевосита ҳамкорлик қилишга тайёр бўлган 3 мингдан зиёдроқ одам илинади.