Бухоро вилояти Когон шаҳрида 64 хонадонга мўлжалланган тўрт қаватли “Камолот” уйи фойдаланишга топширилди, деб хабар берди УзА.

Вилоят ва шаҳар ҳокимликлари мутасаддилари, жамоат ташкилотлари вакиллари, ёшлар, оммавий ахборот воситалари ходимлари иштирок этган тадбирда Президентимиз раҳнамолигида ёш оилаларни ҳар томонлама қўллаб-қувватлаш, уларга муносиб турмуш шароити яратишга қаратилаётган алоҳида эътибор юксак самаралар бераётгани таъкидланди. Давлатимиз раҳбарининг 2014 йил 6 февралдаги “Ўзбекистон Республикасида ёшларга оид давлат сиёсатини амалга оширишга қаратилган қўшимча чора-тадбирлар тўғрисида”ги қарори бу борадаги ишларни янги босқичда давом эттиришда муҳим дастуриламал бўлмоқда.

“Камолот” уйи “Марсианин плюс” масъулияти чекланган жамияти қурувчилари томонидан барпо этилди. Маросимда ёш оилаларга икки ва уч хонали уйларнинг калити топширилди. Улар орасида мамлакатимиз ижтимоий-иқтисодий ҳаётида фидокорона меҳнати билан тенгдошларига намуна бўлаётган турли касб эгалари, юртимиз шарафини халқаро миқёсда улуғлаётган ёш спортчилар бор.

– Мен дунёнинг кўплаб мамлакатларида бўлдим, – дейди ўзбек жанг санъати бўйича беш карра Ўзбекистон чемпиони, нуфузли халқаро мусобақалар совриндори Нодир Жумаев. – Ҳеч бир юртда ёшларга бизнинг мамлакатимизда бўлгани каби алоҳида эътибор ва ғамхўрлик кўрсатилмайди. Мана, “Камолот” уйи бунинг ёрқин тасдиғидир. Биз икки хонали уйга узоқ муддатли имтиёзли кредит эвазига, ҳеч қандай бадал тўловисиз эга бўлдик. Бундай оталарча ғамхўрлик учун давлатимиз раҳбаридан миннатдормиз.

Когон темирйўлчилар шаҳри сифатида ҳам эътироф этилади. Табиийки, “Камолот” уйи калитини олганлар орасида ҳам темирйўлчилар кўпчиликни ташкил этади.

– Сизларга ҳавасимиз келади, бизнинг давримизда ёшларга бундай эътибор бўлмаган, дейишади ёши улуғ ҳамкасбларим, – дейди “Ўзбекистон темир йўллари” давлат акциядорлик компаниясининг Бухоро алоқа ва ишорат масофаси катта электромеханиги Умид Ғаффоров. – Улар ҳақ. Ёшим 26 да. Уч кишидан иборат оиламиз билан алоҳида квартирага кўчиб ўтдик. Банк кредитининг узоқ муддатли экани ёш оилалар учун жуда қулай. Турмуш ўртоғим ҳам темирйўлчи. Биз, темирйўлчилар оиласи юртимиз равнақи йўлида янада самарали меҳнат қиламиз.

“Камолот” уйи тобора чирой очаётган Аҳиллик кўчаси қиёфасини янада ўзгартириб юборди. Йил охирига қадар бу кўчада 32 хонадонга мўлжалланган яна бир кўп қаватли бино қурилиши режалаштирилган.

Тадбирда Бухоро вилояти ҳокими М.Эсонов сўзга чиқди.