2015 йил 6 июлда Қозоғистоннинг Атирау шаҳридаги спорт саройида бокс бўйича катталар ўртасида Қозоғистон бокс федерациясининг фахрий президенти А.А.Кулибаев шарафига халқаро мусобақа ўтказилди.

Мусобақада юқори ўринлар учун 9 та давлат – Иордания, Қирғизистон, Мўғилистон, Россия, Сурия, Тожикистон, Украина, Ўзбекистон ва Қозоғистон боксчилари кураш олиб бордилар. Ҳаммаси бўлиб мусобақада 10 та медаллар комплекти ўйналди.

Ўзбекистон терма жамоаси ҳам ушбу мусобақада муносиб иштирок этди: 52 кг гача вазн тоифасида Шаҳобиддин Зоиров 3:0 ҳисобида қозоғистонлик боксчи Бойназов устидан; 69 кг гача вазн тоифасида Одилбек Асланов 2:1 ҳисобида қозоғистонлик боксчи Манашев устидан; Меликўзиев Бектемир 75 кг гача вазн тоифасида 3:0 ҳисобида россиялик боксчи Фидурин устидан ва 91 кг дан юқори вазн тоифаси финалида Абдуллаев Мирзохиджон 3:0 ҳисобида иорданиялик Жохаис устидан ғалаба қозониб, олтин медалларни қўлга киритдилар. Шуҳрат Абдуллаев (81 кг гача) кумуш, Абдулхай Шерматов (52 кг гача) ва Элшод Расулов (81 кг гача) бронза медалларни қўлга киритдилар. Жамоа бош мураббийи Рустам Саидов, мураббийлар штаби аъзолари Истам Кабинов, Набижон Бойматов.
Мусобақанинг ҳакамлар ҳайъатига ўзбекистонлик ҳакам Шерзод Ахмедов ҳам кирди.