Россия президенти Владимир Путин Уфада бўлиб ўтаётган БРИКС ва ШҲТ саммитида Ҳиндистон бош вазири Нарендра Моди билан учрашуви давомида Модига ўзининг спорт тайёргарлигидан келиб чиққан ҳолда йога билан шуғулланиб кўришга ваъда берди.

Россия БМТда Ҳиндистоннинг халқаро йога кунига асос солиш таклифини қўллаб-қувватлагани ва Россияда бу байрамнинг кенг нишонлангани учун Моди Россияга билдирган миннатдорчилигига Путин шу тариқа изоҳ берди.

“Шуғулланмаганим битта йога қолди. У ўзига жалб қилмаслигининг иложи йўқ. Мен ўз спорт тайёргарлигим даражасидан келиб чиқиб йога билан шуғулланиш учун нимага қодирлигимни синаб кўраман”, деб айтди Путин.

Путиннинг таъкидлашича, “ҳақиқий йогларга қараганингда улар каби мукаммаликка эришишнинг иложи йўқдек туюлади ва айнан шу ҳолат сени йога билан шуғулланишдан тўхтатади”.

Владимир Путин спортга муҳаббати билан танилган. 2014 йилда Каратэ-до халқаро ташкилоти раҳбариятининг олий органи Кекусин-кан Путинга юқори усталик даражаси – 8-данни берди.

Путин, шунингдек, дзюдо ва самбо бўйича спорт устаси ҳисобланади. Путин 2006 йил сентябрда Европа дзюдо иттифоқининг фахрий президенти этиб тайинланди, 2010 йилда эса Жанубий Кореянинг Ёнин университетининг “Дзюдо соҳаси доктори” фахрий дипломи билан тақдирланди.

Владимир Путин ҳанузгача дзюдо билан шуғуланишни давом эттириб келади ва Россия дзюдо федерациясига кўмак кўрсатиб келади. 2013 йилда Путин тхэквондо яккакураш тури бўйича фахрий 9-дан соҳибига айланди.

Шунингдек, Путин хоккей ҳам ўйнаб туради. Жорий йилнинг 16 май куни Путин Тунги хоккей лигасининг гала-учрашувида иштирок этиб, рақиблар дарвозани 8 марта ишғол қилишга муваффақ бўлган эди.