Тошкентни водий билан боғлаб турган Тошкент-Ўш автомобиль йўлининг қурилиш ишларига ажратилган пулларнинг бир қисмини ўзлаштирган раҳбарлар ҳибсга олинди. Бу ҳақда “Ҳуқуқ” газетаси ахборот берди.
Айтилишича, Илёс Ҳамроқулов, Шавкат Латипов ва Илёс Ёқубовлар “Олмазор” тажриба механика таъмирлаш ёрдамчи ишлаб чиқариш давлат корхонасида ишлаб келган.
2009 йил 1 августдан 2011 йил 1 июлгача корхона раҳбари сифатида ишлаб келган Жалилов цемент-бетон қоплама ишларини бажариш учун республика йўл жамғармаси билан шартнома имзолаган. Унга кўра, корхона ишчилари жами 12.753 млрд сўмлим ишларни пудрат шартномаси асосида бажаришлари, таъмирланиши белгиланган йўлларга 24 см қалинликда бетонли қоплама ётқизишлари керак эди. Аммо раҳбарнинг кўрсатмасига биноан ишчилар қопламани белгиланганидан 4 см юпқароқ қилиб ётқизишган. Ҳужжатларга сохта маълумотлар киритилган.
Иш ҳамжлари лаборатория шароитида ўрганилганида йўлларнинг мустаҳкамлиги 69 фоизни ташкил этди. Корхона раҳбари 991.533 млн сўмлик иш ҳажми сифатсиз бажарилишига сабабчи бўлгани аниқланди.
2013 йилнинг 19 апрелидан 2014 йилнинг 17 январигача корхонага раҳбарлик қилган Латипов ҳисобчи Ёқубов билан Янгийўл туман ДСИга 2013 йил якуни бўйича тақдим этган ҳисоботларда қалбакиллика йўл қўйгани, 17.879 млн сўм солиқни тўламагани аниқланди.
Бу уч шахс судланиб, тегишли жазога ҳукм қилинди. Улар томонидан давлатга келтирилган 63.424 млн сўм зарар тўла қопланди.