Шанхай ҳамкорлик ташкилотига аъзо давлатларнинг тегишли органлари ўз вақтида разведка маълумотлари билан алмашиб, террорчи гуруҳларга қарши биргаликда курашиш учун ишчи гуруҳлар ташкил қилиб бормоқда. Бу ҳақда ШҲТ минтақавий аксилтеррор структураси ижроия қўмитаси директори Чжан Синьфэн баёнот берди.
“Хусусан, террорчиликка қарши интернетда курашиш учун структура алоҳида ҳамкорлик механизмини яратди: экспертларнинг қўшма ишчи гуруҳлари ташкил қилинди, интернет назорати кучайтирилди, интернетда террорчилар томонидан жойлаштирилаётган суратлар, аудио ва видеотасвирлар назорати амалга оширилмоқда”, – унинг сўзларини келтиради Синьхуа агентлиги.
Айни пайтда структура таркибига Россия, Қозоғистон, Хитой, Тожикистон, Ўзбекистон ва Қирғизистон киради.