Уфада Ҳиндистон ва Покистон бош вазирларининг учрашуви бўлиб ўтиши тасдиқланди. Бу ҳақда Ҳиндистон ТИВ расмий вакили, бош вазир билан бирга саммитга ташриф буюрган Викас Сварап маълумот берди.
“Ҳиндистон бош вазири Нарендра Моди ва Покистон бош вазири Навоз Шариф 10 июль куни маҳаллий вақт билан 19:15да учрашади”, – деб ёзди у Twitter’даги саҳифасида.
Ҳар иккала етакчи Уфада бўлиб ўтаётган ШҲТ саммитида иштирок этмоқда. Ҳиндистон ва Покистон ҳозирча ушбу ташкилотда кузатувчи мақомига эга.
Охирги марта Моди ва Шариф ўтган йилнинг августида, Бхарата Жаната Партининг умумпарламент сайловларидаги ғалабасидан сўнг Модининг инаугурация маросимида учрашишган эди.