Истанбул шаҳридаги кўчалардан бири "Барселона" жамоасига ўтган ярим ҳимоячи Арда Турон шарафига қайта номланади. Бу ҳақда Sky Sports нашри хабар берган.

Ушбу шаҳарнинг Байрампошшо туманидаги Арда Турон туғилган кўчага унинг номи берилади.

"Биз Орду кўчаси номини Арда Турон номига ўзгартирмоқчимиз. Биз шаҳар маъмуриятига шу бўйича мурожаатнома жўнатдик. Турон бизнинг фахримиздир", дейди Байрампошшо тумани ҳокими Атила Айдинер.

Эслатиб ўтамиз, Турон шу йилнинг 7 июль куни расман "Барселона" аъзосига айланди. Ушбу 28 ёшли футболчи учун каталонияликлар "Атлетико"га 34 млн евро тўлашган.

У 2011 йилда "Галатасарой"дан "Атлетико" сафига бориб қўшилганди.