Аёлларнинг “очиқ-сочиқ” кийиниши турли тери касалликларини келтириб чиқариши мумкин. Бу ҳақда тиббиёт фанлари номзоди Ихлос Шукуров айтиб ўтди.
“Аёлларнинг териси нозик ва таъсирчан бўлади. Ҳозирда табиатда ультрабинафша нурларининг кўпайиши ва аёлларимизнинг очиқ-сочиқ кийиниши натижасида қуёш таъсирида юзага келадиган кўп шаклли эксудатив эритема ва фотоконтактли дерматит хасталиклари, тери тошмалари учраб турибди. Кимдир бир марта енгил кийиниб, касал бўлиб қолармидим, деб эътироз билдириши мумкин. Лекин бу нотўғри. Бир марта очиқ кийинган ҳолда қуёш тиғида юриб айрим касалликларни орттириб олиш мумкин”, – унинг сўзларини келтиради “Жамият” газетаси.

Охирги ойларда Ўзбекистонда аёлларнинг кийиниш маданияти муҳокамаси тўхтамаяпти. Бир қатор газеталар билан бир қаторда, Хотин-қизлар қўмитаси масъул ходимлари ҳам бу масала ҳақида ўз фикрларини айтиб ўтдилар. ОАВда чиқиш қилаётган журналистлар ва жамоат арбобларининг фикрлари доимо бир жойдан чиқмоқда: “очиқ-сочиқ” кийиниш қаттиқ танқид остига олинмоқда.