Бишкекда Қирғизистон ҳуқуқ-тартибот муассасалари ходимлари томонидан автомобилда спорт сумкасига солинган 23 кг героин олиб кетаётган Россия фуқароси қўлга олинди. Бу ҳақда Қирғизистон Гиёҳванд моддаларни назорат қилиш давлат хизмати вакилига иқтибос келтирган ҳолда “Интерфакс” ахборот агентлиги хабар бермоқда.

Гиёҳванд моддалар скотч билан ўралган 46 та пакетга солинган бўлган. Наркокурьер махсус операция доирасида Афғонистондан Қирғизистонга гиёҳванд моддаларни олиб ўтмоқчи бўлганда қўлга олинди.

Маълумотларга кўра, қўлга олинган жиноятчи қўшни Тожикистондан бўлиб, накробизнес билан шуғулланувчи жиноий гуруҳ аъзоси бўлган. Ушбу ҳолат юзасидан жиноий иш қўзғатилди.

Россия Гиёҳванд моддалар айланмасини назорат қилиш федерал хизмати раҳбари Виктор Ивановнинг айтишича, Россияга олиб кириладиган героиннинг 100 фоизи Афғонистонда ишлаб чиқарилади. Хизмат афғон наркотрафигига курашиш самарадорлигини ошириш мақсадида Қирғизистон ва Тожикистоннинг масъул органлари билан ўзаро ҳаракатларни кучайтирмоқда.