Рим папаси Франциск Эквадордан Боливияга парвози давомида таркибида кока (баргидан кокаин олинадиган бута) барглари бўлган чойдан истеъмол қилиб кўрди. Бу ҳақда Reuters ахборот агентлиги хабар бермоқда.

Понтифик таркибида кокадан ташқари мойчечак (ромашка) ва анис уруғлари бўлган “Тримате” деб номланувчи бу ичимликдан денгиз сатҳидан 4 минг метр баландликда жойлашган Боливия пойтахти Ла-Пасга келиши олдидан ўзини тетик сезиш учун истеъмол қилиб кўришга қарор қилди. Стюардессанинг айтишича, Папага самолёт бортида ҳамроҳлик қилган журналистларга ҳам ушбу чойдан истеъмол қилиб кўриш таклиф қилинган.

Эль-Альто аэропортида Францискни Боливия президенти Эво Моралес кутиб олди ҳамда шу муносабат билан нутқ сўзлади. Дастлаб нутқ 15 дақиқа давом этиши белгиланган эди, бироқ уни 5 дақиқагача қисқартиришга қарор қилинди. Қайд этилишича, бунга пойтахтнинг жуда баланд жойлашгани бир ўпка билан яшовчи 78 ёшли Папанинг саломатлигига салбий таъсир кўрсатиши мумкинлиги сабаб бўлган.

Моралес Папага Анд ҳудуди туб аҳолиси кока баргларини сақлайдиган альпак (ламага ўхшаш туёқли жонзот) жунидан тайёрланган қопчани совға қилди.

Францискнинг кокаин гиёҳванд моддаси олиш учун хом ашё саналадиган кока баргини истеъмол қилиб кўриш истаги ҳақида Боливия маданият вазири Марко Мачикао маълум қилди. Унинг айтишича, понтификнинг мамлакатга ташрифи арафасида мамлакат раҳбарияти унга кокадан дамланган чой ичиб кўришни таклиф қилган, бироқ Рим Папаси уни чайнаб кўриш истагини билдирган.

Маълумот учун, кока барглари БМТнинг 1961 йилдаги гиёҳванд моддалар ҳақидаги конвенциясига кўра, ноқонуний модда деб эълон қилинган. Бироқ Боливияда ундан диний ёки тиббий мақсадларда фойдаланишга рухсат берилган. Анд минтақаси туб халқлари кока баргларини ўзларини тетик ҳис қилиш мақсадида чайнаб юришади. Боливия президенти Эво Моралес кокадан фойдаланишни ёқлаб чиқади ва уни муқаддас ўсимлик ҳисоблайди. 2009 йилда мамлакат конституциясига кокани “Боливиянинг маданий мероси” деб таърифловчи банд киритилган.