АҚШ Федерал қидирувлар бюроси "ИШИД" террорчи ташкилоти тарафдорларининг АҚШда 4 июль – Мустақиллик кунида терактлар амалга оширмоқчи бўлган фитнасини фош қилди, деб хабар бермоқда ФҚБ директори Жеймс Коми.

Комининг айтишича, тергов давомида охирги 4 ҳафта ичида ушбу ҳолат бўйича 10 киши ҳибсга олинган. Коми АҚШда "ИШИД" таъсирида бўлган яна 10 киши борлиги, бироқ улар алоқа қилишда “шифрланган маълумотлар”дан фойдаланганлари туфайли уларни аниқлаш мураккаблик туғдираётганини айтган.

Аввалроқ Коми айнан шу “шифрланган маълумотлар” туфайли АҚШ террорчилик тарғиботининг ижтимоий тармоқларда тарқалишини назорат қила олмаётганини айтган эди. Бу муаммони ечиш учун махсус қонун керак бўлиб, ҳозирда АҚШ компаниялари билан биргаликда ушбу қонун устида иш олиб борилмоқда.

ФҚБ директорининг айтишича, умумий ҳисобда АҚШда "ИШИД" сафида жанг қилиш учун Яқин Шарққа жўнаб кетган ёки кетмоқчи бўлган 200 нафардан ортиқроқ АҚШ фуқароси аниқланган.