Ўзбекистон президенти Ислом Каримовнинг фикрича, Шанхай ҳамкорлик ташкилоти таркибига ядровий қуролга эга янги мамлакатлар, айнан Ҳиндистон ва Покистоннинг кириши жаҳон сиёсий харитасини ўзгартириб юборади. Бу ҳақда у Россия президенти Владимир Путин билан ўтказилган икки томонлама учрашув чоғида айтиб ўтди.
“Бу икки давлат оддий эмас, балки ядровий қуролга эга эканлигини ҳисобга олсак, уларнинг ташкилотга қўшилиш жараёни қандай кечади? Агар шу жиҳатдан қарасак, уларнинг ШҲТ таркибига кириши нафақат сиёсий харитани ўзгартиради, балки, ўйлашимча, куч тақсимотини ҳам ўзгартиради”, – унинг сўзларини келтиради ТАСС агентлиги.