Машҳур филиппинлик боксчи Мэнни Пакьяо Индонезиядаги Жокьякарта қамоғида сақланаётган, ўлим жазосига ҳукм қилинган филиппинлик аёл билан учрашди. Бу ҳақда Associated Press агентлиги хабар бермоқда.
Адвокат Эдре Олалиа берган маълумотга кўра, Пакьяо Мэри Жейм Велосони кўргани рафиқаси билан борган ҳамда қамоқда бир соатча бўлган.
Велосо хоним 2010 йили гиёҳванд моддалар савдоси туфайли қатлга ҳукм қилинган эди. Жокьякарта шаҳри аэропортида унинг юклари ичидан героин топилиши бунга сабаб бўлганди.
Жорий йилнинг апрелида жазо ижроси ортга сурилди, аммо ундан бошқа 8 чет эллик қатл қилинди.
Адвокатнинг айтишича, барча суд инстанцияларига мурожаат қилиб бўлинган, энди аёлни фақат авф этиш қарори қутқариши мумкин.