Россия Ҳарбий-ҳаво кучларининг Узоқ авиацияси учун Ту-160 “Оқ оққуш” стратегик бомбардимончи самолётларини қайта ишлаб чиқариш бўйича ишлар бошланди, деб хабар берди 9 июль куни Россия Мудофаа вазири ўринбосари Юрий Борисов.

“Ту-160 самолётини янги кўринишда ишлаб чиқариш бўйича қарор қабул қилинди. Биз тез суръатлар билан ишламоқдамиз, ишчи гуруҳ ташкил этдик, Савдо-саноат вазирлиги билан бу ишларнинг олиб борилиши бўйича ойлик йиғилишлар ўтказишга келишиб олдик, бош конструкторлар тайинланди – иш нормал босқичда кетмоқда”, дейди Борисов Мудофаа-саноат мажмуаси касаба ташкилотлари раҳбарлари билан ҳар йили ўтказиладиган учрашувда.

Жорий йилнинг апрелида Россия Мудофаа вазири Сергей Шойгу Ту-160 самолётларини қайта ишлаб чиқариш зарурлигини маълум қилган эди.

Борисовнинг айтишича, бу эски планер кўринишидаги, бироқ янги қурилмалар билан жиҳозланган мутлақ янги самолёт бўлади. Янги самолётнинг самарадорлиги ўзининг аввалги нусхасиникидан 2,5 баробарга оширилади. Самолёт 2023 йилга қадар ишлаб чиқарилиши кутилмоқда.