Таиланднинг Анқарадаги элчихонаси номаълум муддатга ёпилди. Бу ҳақда Yahoo News хабар бермоқда.

Бундан ташқари, Таиланднинг Истанбулдаги консуллиги вақтинчалик ишини тўхтатди. Бунга 9 июлга ўтар тунда уйғур диаспорасининг консулликка уюштирган ҳужуми сабаб бўлди. Уйғурлар таёқлар билан бино ойналарини синдириб, ходимларнинг буюмларини сочиб ташлашди. Лекин ҳеч ким яраланмади.

Норозилик акциялари расмий Банкокнинг Хитойга 97 нафар уйғурни депортация қилгани ҳақидаги хабар тарқалгандан сўнг авж олди. Улар 2014 йил мартида қўлга олинган эди. Полиция махсус амалиёт давомида мамлакат жанубидаги плантацияда 400 нафар уйғур қул аҳволида ишлаётганини аниқлаган эди.

Ҳуқуқ ҳимоячилари Таиланд раҳбариятининг бу қароридан хавотирда эканлигини айтди, чунки Хитой фуқаролари бўлмиш уйғурлар у ерда қийноққа солиниши ва қамалиши мумкин. Таиланд, ўз навбатида, депорт қилинганлар тақдирини кузатиб боришини маълум қилди.