Тинч океани томондан "Чан-хом" тайфуни Хитойнинг шарқий қирғоқларига келиб урилди. Бу ҳақда "Сина" портали маълум қилган.

Хабарда айтилишича, тайфуннинг асосий кучи Чжецзянь вилоятидаги Чжоушань шаҳрига зарба берган. Метеорологлар бу ҳудудда шамол кучи сониясига 45 мертни ташкил қилаётганини айтишган.

Бироз олдинроқ, шу тайфун келиши арафасида Хитойнинг шарқий қирғоқлари ҳудудидан 960 минг киши эвакуация қилингани ҳақида хабар берилганди.

Хавфлилик даражаси юқори ҳудудларда 600 авиарейс бекор қилинган, аэропортлар ёпилган. Шунингдек, денгизда қатновлар тўхтатилиб, 30 мингга яқин кема ва қайиқлар портларга қайтарилган. Қолаверса, узоқ масофага қатновчи поезд ҳамда автобуслар ҳаракати тўхтатилган.
“Чан-хом" тайфуни шу ҳафтанинг ўзида Хитойга дахл қилаётган иккинчи тайфун ҳисобланади. 9 июль куни ҳам Хитой жанубига "Ляньхуа" тайфуни ёпирилган ва ундан 1,6 млн киши жабрланганди. Бу тайфун келтирган зарар 1,3 млрд юан (213 млн доллар)га баҳоланган.