Ўзбекистон Республикаси Президенти Ислом Каримов 10 июль куни Уфада ўтказилган ШҲТ саммити доирасида Россия Федерацияси Президенти Владимир Путин билан учрашди.

Ушбу учрашув Ўзбекистон билан Россия ўртасида иттифоқчилик муносабатлари ўрнатилганининг 10 йиллигида ўтаётгани ҳамда ҳамкорликнинг барча устувор ва истиқболли йўналишлари бўйича фикр алмашиш учун қулай фурсат экани таъкидланди.

Президентлар сиёсий, савдо-иқтисодий ва гуманитар ҳамкорлик масалаларини муҳокама қилдилар. Минтақавий хавфсизликка доир долзарб масалалар юзасидан фикр алмашилди.

Ўзбекистон ва Россия ШҲТ ва МДҲ доирасида фаол ҳамкорлик қилаётгани қайд этилди.

Россия Ўзбекистоннинг йирик савдо-иқтисодий ва сармоявий шерикларидан бири эканлиги таъкидланди. Мамлакатлар ўртасида товар айирбошлаш ҳажми изчил ортиб бораётгани алоҳида қайд этилди. 2014 йилда бу борадаги кўрсаткич 6 миллиард доллардан ошган.

Владимир Путин Ислом Каримовни давлат ташрифи билан Россия Федерациясига таклиф этди.