Фигурали учиш бўйича икки карра олимпия ўйинлари чемпиони бўлмиш россиялик Евгений Плющенко Японияга уюштирган гастрол сафарини онасининг вафот этгани сабабли тўхтатган ва Россияга қайтган. Бу ҳақда унинг рафиқаси Яна Рудковская маълум қилди.

"9 июль куни Женянинг онаси Татьяна Васильевна касаллик туфайли Санкт-Петербургдаги Халқаро тиббиёт маркази қошидаги шифохонада вафот этди. У ва унинг яқинлари бу хасталикка қарши курашишди. Биз Германия ва Исроилдан энг яхши шифокорларни чақирдик. Лекин бу хасталик бедаво бўлиб чиқди.

Евгений Япониядан ўз сафарини муддатидан олдин якунлаб, қайтиб келди. У ҳозир Санкт-Петербургда", дейди Рудковская ТАСС нашрига берган интервьюсида.