Греклар Грециянинг евроҳудуддан чиқиши вазиятида пулларининг қадрсизланишидан хавфсираб охирги кунларда фаол тарзда iPhone, iPad, компьютер, телевизорлар ва исталган қимматбаҳо техникани сотиб олишмоқда.

Маҳаллий сотувчиларнинг айтишича, авваллари кўпчилик греклар 500 еврога ноутбук сотиб олиш керакми-йўқми деб иккиланишарди, ҳозирда эса кўпчилик ундан 2-3 баробар қимматроқ моделдаги ноутбукларни бир неча кундан кейин ўз пулларини йўқотиб қўйишдан қўрқиб ҳеч қандай муҳокамасиз сотиб олишмоқда.

“Бу вазиятда греклар кўпроқ Apple компаниясининг маҳсулотларини афзал кўришмоқда, чунки iPhone телефонлари, iPad планшетлари ва Mac компьютерлари электрон гаджетлар бозоридаги премиум-синф сегментида юқори улушга эга”, деб айтилмоқда манбаларда.

“Агар банкоматлардан кунига бир киши бошига 60 евро олиш мумкин бўлаётган бўлса, кредит ёки дебет карталар ёрдамида тўловни амалга ошириш фақатгина картанинг лимити билан чекланган. Кўпчилик кредит карталар 3000-8000 евро лимитга эга, шунинг учун агар карта эгасининг ҳисобида шунча пул бўлса, у қимматбаҳо харидлар қила олиши мумкин бўлади”, деб айтмоқда маҳаллий дўконлардан бирининг сотувчиси.

Сотувчининг айтишича, электроника нархи охирги ҳафталарда ўзгармаган, бироқ йил бошига нисбатан евронинг долларга нисбатан курсининг тушиши сабабли нархи кўтарилган. Гаджетлар эса асосан АҚШ долларида ҳисоб-китоб қилувчи давлатлардан сотиб олинади. Мисол учун, барча видео форматларни ўқий олувчи WD Media Player TV WiFi медиаплейери бир неча ой аввал 94 евро турган бўлса, ҳозирда унинг нархи 119,90 еврони ташкил қилмоқда.