Россия терма жамоаси ва Санкт-Петербургнинг “Зенит” жамоасининг собиқ ҳужумчиси Андрей Аршавин Краснодарнинг “Кубань” жамоаси билан шартнома имзолади. Бу ҳақда “Кубань” бош директори Валерий Стаценко маълум қилди.

“Кубань” матбуот котиби жамоанинг янги футболчиси аъло даражадаги жисмоний тайёргарликда эканини айтди.

34 ёшли футболчи билан шартнома бир йилга тузилди.

Маълумот учун, Андрей Аршавин 2000-2008 йиллар, 2012-2015 йиллар давомида “Зенит” сафида тўп суриб, 283 та ўйин ўтказган ҳамда 57 та гол муаллифига айланган. Уч карра Россия чемпиони (2007, 2012, 2015), Россия суперкубоги (2008), Россия Премьер-лигаси Кубоги (2003), УЕФА Кубоги (2008), УЕФА Суперкубоги (2008), Россия терма жамоаси сафида 2008 йилги Европа чемпионати бронза медали соҳиби ҳисобланади.

Аршавин 2009-2013 йиллар мобайнида Лондоннинг “Арсенал” клуби таркибида тўп сурган ҳамда 103 та ўйинда рақиблар дарвозасига 23 та тўп киритган.