2014 йилнинг бошидан жорий йилнинг апрель ойи охиригача Ироқда 15 мингга яқин тинч аҳоли ўлдирилган.

Бу маълумотлар БМТнинг Боғдоддаги ваколатхонасининг махсус ҳисоботида берилди.

БМТ ваколатхонасининг маълумотларига кўра, ушбу давр ичида БМТ томонидан Ироқнинг тинч аҳолиси орасида камида 44 минг 136 киши жабр кўргани, улардан 14 минг 947 нафари ўлдирилгани ва 29 минг 189 нафари яралангани қайд этилган.

БМТ ваколатхонасининг изоҳлашича, бунда “расман тасдиқланган ўлимлар ва жароҳатлар сони ҳисобга олинган”. Аслида эса қурбонларнинг ҳақиқий сони ҳисоботда келтирилган рақамлардан анча кўпроқни ташкил қилади, деб таъкидланмоқда ваколатхонада.

Шунингдек, бу ҳисоботда “Ироқ армиясининг минглаб ҳалок бўлган ҳарбийлари ва Ироқ ҳукумати қўшинлари билан жангларда ҳалок бўлган ИШИД тарафдорларининг миқдори” ҳам ҳисобга олинмаган, чунки тўқнашувларнинг икки томони ҳам ўз йўқотишлари ҳақида ҳеч қандай расмий маълумотлар бермайди.