2018 йилги футбол бўйича жаҳон чемпионати ўйинлари ўтказиладиган Сочидаги "Фишт" номли ўйингоҳнинг таъмирлаш ишлари 2016 йилнинг 30 июнь санасида тугалланади. Бу ҳақда Россия қурилиш, архитектура ва йўл хўжалиги вазири Валерий Жуковга асосланиб, "Интерфакс" хабар берди.

"Жараённинг биринчи босқичидаги ишлар якунланган. Бир ойдан кейин стадион атрофида янги манзара пайдо бўлади. Иккинчи босқичда реконструкция ишлари амалга оширилади. Ўйингоҳда 40 минг томошабин сиғими учун шароит яратилади. Барча шароитлар ФИФА талабидагидек бўлади", дейди Жуков.

Унинг маълум қилишича, мутахассислар экспертизаси аллақачон тайёр бўлган. Шу ойнинг охиригача лойиҳанинг тўлиқ экспертизаси олинади.

Маълумот учун, ушбу стадионни ЖЧ-2018 ўйинлари учун тайёрлаш ишига 3,5 млрд доллар йўналтирилган бўлиб, шундан 700 млн долларлик қисми қайта монтажлаш ишлари учун ажратилган.