Украина Ташқи ишлар вазирлиги матбуот хизмати раҳбари Алена Вашенко Беларусдан Россияга ўтган 160 га яқин украиналик қўлга олинганини маълум қилди. Бу ҳақда “Интерфакс-Украина” ахборот агентлиги хабар бермоқда.

“2015 йил 12 июлда телефон орқали Украинанинг Санкт-Петербургдаги бош консуллигига 11 июлда Беларусь-Россия чегарасини автомобилларда кесиб ўтаётган Украина фуқаролари Россия Федерал хавфсизлик хизмати чегара хизмати томонидан ушлангани ва Псков вилоятининг Невель шаҳрида ушлаб турилганлари ҳақида маълумот келиб тушди”, деб айтмоқда Ващенко.

Вашенконинг айтишича, украиналикларнинг паспортлари олиб қўйилган ва уларга ҳаракатланиш тақиқланган.

“Россия Федерал хавфсизлик хизмати чегара хизмати бошқармаси раҳбари бу хатти-ҳаракатларни учинчи давлат фуқаролари Россиянинг Беларусь билан чегарасини кесиб ўтишга ҳақлари йўқлиги билан тушунтирган. Украина фуқаролари чегарани халқаро ўтказиш пунктларида кесиб ўтишлари мумкин”, деб айтилмоқда ОАВларда.

Қайд этилишича, 13 июлда Невелда эрталабки пайт 60 нафар украиналик ушлаб турилган.