Ўзбекистон давлат консерваторияси биносида “Йилнинг энг фаол ёш мутахассиси” кўрик танлови Тошкент шаҳар босқичи ғолибларини тақдирлашга бағишланган маънавий-маърифий тадбир бўлиб ўтди. Тадбир ташкилотчилари Ўзбекистон касаба уюшмалари федерацияси кенгаши, Олий ва ўрта махсус таълим вазирлиги, Ўзбекистон савдо-саноат палатаси, “Камолот” ЁИҲ марказий кенгаши ва Ўзбекистон Фанлар Академиясидир.
Танловда турли муассасаларда ишловчи ёш ходимлар “Энг фаол ёш маданият ходими”, “Энг фаол ёш олим”, “Энг фаол ёш тадбиркор”, “Энг фаол ёш банк ходими”, “Энг фаол ёш шифокор” сингари номинацияларда беллашдилар. 1-2 босқичда ғолибликни қўлга киритган иштирокчилар республика босқичига йўл олди.
“Тошкент оқшоми” газетасининг ёзишича, тадбирда танловнинг шаҳар босқичи ғолиблари ва совриндорларига барча ҳамкор ташкилотлар иштирокида Тошкент шаҳар касаба уюшмалари ташкилотлари бирлашмаси кенгаши томонидан эсдалик совғалари ҳамда дипломлар топширилди. Шунингдек, касаба уюшмалари фаолиятини матбуот ва ОАВда ёритишга муносиб ҳисса қўшган бир гуруҳ матбуот ходимлари ҳам эсдалик совғалари билан тақдирланди.