Самарқандлик Сония Бикмаева Россиянинг Псков шаҳрида яшаб ва ишлаб келаётган ўғлининг олдида бир муддат бўлиб, касал бўлиб, тўшакка михланиб қолган келинига қараб турди. Доктор беморга “Феназепам” дорисини тайинлади. Бикмаева 50та таблетка бўлган бир қути дори сотиб олиб, уни келинига ичирди. Қутида 37та таблетка қолганида у Ўзбекистонга қайтиб кетди ва дориларни яшириб, ўзи билан бирга олиб кетди.
“Ҳуқуқ” нашрининг ёзишича, орадан анча вақт ўтиб, Россияга қайтиш чоғида аёл ушбу дорини яна олиб кетишга ҳаракат қилди. Лекин текширув жараёнида унинг ёнидан топилган “Феназепам” дори воситаси муомалада бўлиши назорат остида бўлган дорилар қаторига киритилган эди. Шу боис Бикмаева қўлга олиниб, судга топширилди.
Суд Бикмаевага 5 йил 2 ой озодликдан маҳрум қилиш жазосини тайинлади. Аммо унинг пушаймонлигини, дорининг хавфли томонларидан бехабар эканлиги ҳамда ушбу дорини ноқонуний тарқатишга ҳаракат қилмагани эътиборга олиниб, жазо 2 йил синов муддати билан алмаштирилди.