Корея метереология хизмати раҳбари ўринбосари Жонг Хонг Санг Ўзбекистонга ташриф буюриб, иқлим ўзгариши бўйича ҳукуматлараро экспертлар гуруҳи доирасидаги ҳамкорлик истиқболларини ўзбекистонлик ҳамкасблари билан муҳокама қилди.
Ташриф давомида Хонг Санг Ўзбекистон ҳукумати қошидаги гидрометереология хизмати маркази вакиллари билан учрашув ўтказди. “Жаҳон” ахборот агентлигига берган интервьюсида у иқлим ўзгаришлари борасидаги тадқиқотларда ўзаро ҳамкорлик йўлга қўйилганини ва бу ҳамкорликнинг истиқболлари яхши эканлигини алоҳида таъкидлаб ўтди.
“Ўзбекистонга иккинчи бор ташриф буюришим. Биринчи келганимдаёқ ушбу қуёшли ўлка гўзаллигидан таъсирланган эдим. Бой ўтмишингиз ҳам диққатимни тортади. Ҳар келганимда ўзим учун янги саҳифа очгандай бўламан. Корея ва Ўзбекистон ўртасидаги алоқалар кўп соҳаларда мустаҳкамланиб бормоқда. Хусусан, ўтган йили Ўзбекистонга бизнинг президентимиз Пак Кин Хе ташриф буюрди. Яқиндагина Ўзбекистон президенти Ислом Каримов Жанубий Кореяга сафар уюштирди. Ҳамкорлигимиз айниқса иқтисодиёт, таълим, маданият сингари соҳаларда самарали ривожланмоқда”, – деди Хонг Санг агентлик мухбири билан суҳбат чоғида.