Ўзбекистон ҳукумати ишлаб чиқариш харажатлари ва маҳсулот таннархини камайтириш, четдан олиб кирилаётган ва сотилаётган маиший электр асбоблар ҳамда қурилаётган бино ва иншоотларнинг электр самарадорлигини таъминлаш мақсадида электр асбоблар ва биноларни мажбурий энергетик маркировкалаш ва сертификатлаш тизимини жорий қилиш ҳақида қарор қабул қилди.

Қарорга кўра, 2016 йилнинг 1 январидан Ўзбекистонда мамлакат ҳудудига олиб кирилаётган ва сотилаётган маиший электр асбобларнинг техник ҳужжатларида, маркировкаси ва этикеткаларида мажбурий тартибда тегишли энергия самарадорлик синфи ҳақидаги маълумотни кўрсатиш талаби киритилмоқда.

Маиший техника ва электроникани энергия самарадорлик синфини белгилаш учун “А”, “В”, “С”, “D”, “Е”, “F”, “G” белгилашлар киритилмоқда. Бунда “А” синф энг юқори энергия самарадорликка эга ва мос равишда “G” энг кам энергия самарадорликка эга маиший электр асбобларини белгилаш учун ишлатилади. Энергия самарадорликнинг “А+”, “А++” ва ундан юқорироқ қўшимча синфлари “А” синфи учун белгиланган даражадан анча кўпроқ энергия самарадорликка эга маиший электр асбобларни белгилаш учун қўлланади.

Бундан ташқари, ҳужжатлари, маркировкаси ва этикеткаларида энергия самарадорлик ҳақида маълумот берилмаган маиший техника ва электроникани 2016 йилнинг 1 январидан Ўзбекистон ҳудудига олиб кириш ва 2016 йилнинг 1 июлидан сотиш тақиқланади. Шунингдек, ҳукумат қарори билан босқичма-босқич тартибда – 2017 йил 1 январдан “G” синфдаги энергия самарадорликка, 2018 йил 1 январдан – “F”, 2019 йил 1 январдан “Е” синфдаги энергия самарадорликка эга маиший электр асбобларнинг олиб кирилиши ва сотилишига тақиқлов киритилади.

Бу талаблар кондиционерлар, музлатгичлар, идиш ювиш, кир ювиш ва кирхона машиналари, электр сув иситгичлар, ҳавони иситиш ва тупроқни иситиш электр қурилмалари, микротўлқинли печлар, электр плиталар, қайнатиш юзалари, мониторлар, телевизорлар, қиздириш лампаларига нисбатан қўлланади.