Россия президенти Владимир Путин Россия Венада Эрон ядровий дастури бўйича эришилган келишувни қўллаб-қувватлашини маълум қилди. Бу ҳақдаги хабарнома Кремлнинг расмий сайтида эълон қилинди.
Илгарироқ Эрон ҳамда воситачилар олтилиги ядровий дастур бўйича келишувга эришгани хабар қилинган эди. Эрон вакиллари келишув амалга ошганини тасдиқлади. Якуний учрашув бугун бўлиб ўтади. Учрашув якунларига кўра матбуот анжумани уюштирилади.
“Россия бугун Венада Эрон ядровий дастури атрофидаги вазиятни барқарорлаштириш борасида эришилган келишувни ҳамда Эрон ва олтилик давлатлари томонидан қабул қилинган қўшма ҳаракат режасини қўллаб-қувватлайди. Ишончимиз комилки, бугун дунё енгил тин олди”, – дейилади Путиннинг баёнотида.
Унинг фикрича, музокара иштирокчилари барқарорлик фойдасига танловни амалга оширди:
“Эрон ядровий дастурини, уран бойитишни МАГАТЭ назорати таъминланган тақдирда ривожлантириш имкониятига эга бўлди. Теҳронга нисбатан жорий қилинган санкциялар бекор қилинди. Биз узоқ вақт шу ишни амалга оширишга чақириб келдик. Бу Россиянинг Эрон билан тинч атом бўйича кенг миқёсли лойиҳаларини амалга ошириш нуқтаи назаридан ҳам муҳимдир”.