BlackBerry компаниясининг Москвадаги офиси ўзини оқламайдиган деб топилиб, вақтинчалик ишини тўхтатди.
Бу қарорнинг расмий сабаблари ошкор этилмади. Компаниянинг Россия бозоридан чиқиб кетиши ҳақидаги гаплар жорий йилнинг баҳоридаёқ тарқаган эди. Ўшанда компаниянинг ҳамкорлари бўлган йирик уяли операторлар Blackberry Enterprise Service'га янги абонентларнинг уланиши тўхтатилганини маълум қилган эди. Шунга қарамай, жорий йилнинг мартида компания Россияда бир қатор янги лойиҳаларни амалга оширди.
BlackBerry компаниясидаги умумий вазият ҳам барқарор эмас. Компания директори Жон Чен бренд сотилмаслиги ва смартфонлар бозоридан чиқиб кетмаслигини кўп бора такрорлаган бўлишига қарамай, компания харажатларни қисқартириш учун турли чора-тадбирларни амалга оширмоқда. Россиядаги ваколатхонанинг ёпилиши ҳам ўзини оқламайдиган харажатларни қисқартириш билан боғлиқ бўлиши мумкинлиги айтилмоқда.