Ҳиндистоннинг Андхра Прадеш штатидаги Ражамандри шаҳрида диний байрам ўтказилиши пайтида юзага келган тиқилинчда 27 киши ҳалок бўлди, улардан 13 нафари аёллар бўлган. Яна 40 киши жароҳат олди.

Воқеа маҳаллий вақт билан соат 07:30 ва 08:00 орасида содир бўлди. Кўп сондаги одамлар Годавари дарёсида таҳорат олиш учун бориладиган зиналарда тўпланишди. Бир неча кун давомида дарёнинг суви илоҳий деб ҳисобланади. Дарёга учта дарвозадан кирилади, айнан улар олдида катта сондаги оломон йиғилган. Фожиа шу дарвозалар очилган пайтда бир аёл оломон босими остида оёқда тура олмай йиқилганидан кейин юз берган.

Ҳуқуқ-тартибот муассасаларининг айтишича, оломонда бир миллионга яқин одам бўлган. Байрамнинг кейинги кунлари яна 40 млн га яқин зиёратчи келиши кутилмоқда.

Шаҳар маъмурияти ҳалок бўлганларнинг таналари маҳаллий шифохонанинг ўликхонасига, жароҳат олганлар эса қўшни шифохонага етказилганларини маълум қилди.

“Ҳозирча 27 киши ҳалок бўлгани ҳақида маълумот бор, улардан кўпчилигини кекса аёллар ташкил қилмоқда”, деб айтмоқда шаҳар маъмурияти вакили.

Қайд этилишича, кўпчилик зиёратчилар маросимнинг бошланишидан анча аввал келиб, анча ҳолдан тойган бўлган.

Маросимга Андхра-Прадеш штати раҳбарияти бошлиғи Чандрабабу Найду ҳам бир неча марта ташриф буюриб, дарёда тантанали ювиниш маросимида иштирок этди. Фожиадан кейин Найду қурбонлар оилаларига ўз таъзиясини билдирди. Найду қутқарув хизматлари ҳаракатлари унинг шахсий назоратида эканлигини ва ҳалок бўлганлар оилаларига 100 минг рупийдан моддий ёрдам ажратилишини маълум қилди.

Шу билан биргаликда, штат раҳбари барча зиёратчилардан бундай нохуш воқеалар содир бўлмаслиги учун дарёга тушаётган пайтда навбатга риоя қилишни сўради.

Годавари дарёсида ювиниш маросими 12 йилда бир марта амалга оширилади. Бу йилги маросим астрономик нуқтаи назардан айниқса жуда қимматли ҳисобланади, чунки бу йилги байрам 144 йилда бир марта келадиган Маха Пушкаралу байрами билан бир вақтга тўғри келмоқда.