Ўзбекистон Вазирлар Маҳкамаси тегишли қарор билан яна учта бошқарма – Молия вазирлиги, Давлат рақобат қўмитаси ҳузуридаги қимматбаҳо қоғозлар бозорини мувофиқлаштириш ва ривожлантириш Маркази ва Хусусийлаштириш, монополиядан чиқариш ва рақобатни ривожлантириш Давлат қўмитасига жиноий фаолиятдан олинган даромадларни қонунийлаштиришга қарши кураш билан шуғулланиш вазифасини юклади.
Аввал бу фаолият билан фақатгина Бош прокуратура ҳузуридаги солиқ, валюта жиноятлари ва жиноий даромадларни қонунийлаштиришга қарши курашиш департаменти шуғулланган.

Ушбу қарор билан ҳукуматнинг баъзи қарорларига жиноий фаолиятдан олинган даромадларни қонунийлаштириш ва террорчиликни молиялаштиришга қарши курашиш мақсадида ўзгартиришлар ва қўшимчалар киритилди.

Молия вазирлиги суғуртачилар ва суғурта воситачилари, лизинг хизматлари кўрсатувчи ташкилотлар (банк ва кредит ташкилотлардан ташқари), лоторея ва рискка асосланган ўйинларни ташкил қилувчилар ва аудитор тиашкилотларини; Давлат рақобат қўмитаси ҳузуридаги қимматбаҳо қоғозлар бозорини мувофиқлаштириш ва ривожлантириш Маркази қимматбаҳо қоғозлар иштирокчиларини (банклар ва суғуртачилардан ташқари); Давлат рақобат қўмитаси биржа аъзолари ва риэлторлик ташкилотлари фаолиятини назорат қилади ва текширади.

Бу ташкилотларга бир ойлик муддат ичида ўз меъёрий-ҳуқуқий ҳужжатларини янги қарорга мувофиқ тартибга келтириш вазифаси юклатилди.