Покистонлик ҳуқуқ ҳимоячиси, 2014 йили тинчлик бўйича Нобель мукофотини олган Малала Юсуфзай Ливанда суриялик қочқинлар учун мактаб очди. Daily Mail нашрининг ёзишича, покистонлик пуштун қиз Ливанда айни пайтда вояга етганини ҳам нишонлади.
“Мен бекорга Бекаъ водийсидаги қочқинлар лагерини танламадим. Мен туғилган кунимни суриялик опаларим ва сингилларим ичида кутиб олмоқчи эдим. Мен уларнинг қисматини енгиллаштиришга ҳаракат қиламан”, – деди Юсуфзай мактабнинг очилиш маросимида.
Юсуфзайнинг сўзларига қараганда, у ўз сафарини “қуролли ихтилофлар туфайли мактабга бора олмайдиган 28 млн болалар олдидаги бурч” туфайли амалга оширган.
“Ливандан туриб барча давлатлар етакчилари ва ҳукуматлари хабар йўлламоқчиман: маблағни ўқларга эмас, китоб ва дарсликларга ажратинг”, – деди ҳуқуқ ҳимоячиси.
Малалани Байрутга Кайёний жамғармаси таклиф қилди. Ташкилотни тоғли друзлар жамоаси етакчиси Валид Жумблатнинг рафиқаси Нура Жумблат бошқаради. Жамғарма Ливанда турган ярим миллион суриялик қочқин болаларга ғамхўрлик қилиб келмоқда.