Россия спорт вазири Виталий Мутконинг хабар беришича, ФИФА президенти Йозеф Блаттер ЖЧ-2018 саралаш учрашувлари учун қуръа ташлаш маросимида иштирок этиш учун Россияга ташриф буюради. Бу ҳақда РИА «Новсоти» ахборот агентлиги хабар тарқатди.

Манбанинг ёзишича, Блаттер мамлакат президенти Владимир Путин билан учрашишни ҳам сўраган.

«Йозеф Блаттер қуръа ташлаш маросимига ташриф буюради. Кеча Биз бу масалани муҳокама қилдик ва у Россия келишини тасдиқлади. Шунингдек, Блаттер Россия президенти Владимир Путин билан учрашув ташкил қилиб беришни сўради», — дейди Мутко.

Эслатиб ўтамиз, ФИФАда коррупция билан боғлиқ можаролар авж олгач, жорий йилнинг 2 июнь куни Блаттер ФИФА президентлигидан кетишини маълум қилганди.