1 июлдан 15 сентябргача Бухорода Ёзги театр академияси (“Устоз ва шогирд» санъат усталари ёзги мактаби) бўлиб ўтмоқда.

Ушбу лойиҳа Ўзбекистон Маданият ва спорт ишлари вазирлиги, “Ўзбектеатр” уюшмаси ва Швейцариянинг ҳамкорлик бўйича бюроси томонидан ташкил қилинди. Авлиёқули Хўжақулий лойиҳага бадиий раҳбарлик қилмоқда.

Ўзбекистоннинг ҳар бир вилоятидан 5 нафар иштирокчи вокал, саҳна нутқи, хореография бўйича мастер-класслардан ўтмоқда ва кўплаб бошқа кўникмаларга ўқитилишмоқда. Мактабда Ҳамид Маҳмудов (саҳна нутқи), Шуҳрат Абдумаликов (сценография), адабиётшунос, Алишер Навоий ижоди бўйича мутахассис Нафас Шодмонов, танқидчи, театршунос Қамариддин Ортиқов ва бошқалар иштирокчиларга сабоқ беришмоқда.

Ўқитишнинг натижаси сифатида ижодий лойиҳа амалга оширилиб, унинг премьераси 15 сентябрда ўтказилиши режалаштирилган.

Ушбу лойиҳанинг ноёблиги шундан иборатки, унда ҳар бир иштирокчи барча санъат турлари билан ошно бўлиб, театр санъатига анъанавий қарашлар доирасидан ташқарига чиқиб, ўзларига йўл топишлари ва янги ижодий чўққиларни забт этиш учун илҳом билан қувватланишлари мумкин бўлади.