АҚШнинг собиқ президенти Катта Жорж Буш ўзининг Кеннебанкпорт шаҳридаги (Мэн штати) уйида йиқилиб тушиб, бўйин қисми умуртқасини жароҳатлаб олган. Бу ҳақда CNN телеканали хабар берди.

Айни вақтда у Портленддаги шифохонага олиб борилган. Унинг аҳволи барқарор экани айтилмоқда.

"15 июль куни АҚШнинг 41 президенти Мэн штатидаги уйида йиқилиб, бўйин умуртқасини жароҳатлади. Ҳозирда унинг аҳволи барқарорлашган", деб твиттерда ёзади собиқ президентнинг вакили Жим Мак-Грат.

Қайд этиш жоизки, ўтган ҳафтада 91 ёшли Катта Жорж Буш рафиқаси Барбара хоним билан ўзининг иккинчи ўғли Жеб Бушнинг сайловолди кампанияси доирасидаги бир қанча маросимларда иштирок этганди.

У 2014 йилнинг декабрида ҳам нафас олиш йўлларидаги муаммо туфайли шифохонага тушиб қолганди.